Մեծայարգ՝ Մեթր ՊԵՐՃ ՍԵԴՐԱԿԵԱՆ
Նախագահ՝ Հայկական Բարեգործական Ընդհանուր Միութեան
Յարգարժան անդամներ՝ ՀԲԸՄ Կեդրոնական Վարչական Ժողովի
Նիւ Եորք — ԱՄՆ
Սիրելի բարեկամներ,
Սոյն գիրով կու գանք շնորհաւորելու մեր Մեծ Միութեան՝ Հ.Բ.Ը.Մ.ի 91-րդ Ընդհանուր Ժողովի բարեյաջող եւ հպարտառիթ կայացումը, հակառակ քորոնաժահրին պատճառած արտակարգ պայմաններուն:
Մեզի համար անակնկալ մը չէր, որ իր հիմնադրութենէն 115 տարիներ վերջ, ոչ թէ չէին սպառած ՀԲԸՄ-ի ուժերը, այլ ան իր 91-րդ Ընդհանուր Ժողովին կը ներկայանար աւելի եւս կենսունակ: Անոր ներկայ Կեդրոնական Վարչական Ժողովը հաւատարիմ միութեան հիմնադիրներուն գծած ուղիին եւ որպէս արժանաւոր շառաւիղները անոնց, ինչպէս նաեւ որպէս ազնիւ յանձնակատարները ՀԲԸՄ-ի հին ու նոր բարերարներուն կտակներուն եւ մեծահոգի նուիրատուութիւններուն, կը շարունակեն իրենց վստահուած մարդկային եւ ազգային վեհ առաքելութիւնը:
2020 տարին, վերջին տասնամեակներու մարդկային պատմութեան մէջ, լաւագոյնը չէր համաշխարհային դառն իրադարձութիւններով, որոնցմէ անմասն չմնաց Հայ ժողովուրդը: Այս առումով, ՀԲԸՄ-ի գոյութիւնը օրհնութիւն մը եղաւ, իր մարդասիրական եւ բարեսիրական ծրագիրներով հասնելու աշխարհի չորս ծագերu, որպէսզի մարդկութիւնն ու Հայ ժողովուրդի զաւակները նուազագոյն դժուարութիւններով կարենան շրջանցել մարդկային քաղաքակրթութիւնը հարուածող համաճարակին հետեւանքները:
4 Օգոստոս 2020-ի Պէյրութի ցաւալի պայթումին հետեւանքները ամոքելու ազնիւ պարտականութիւնը գտնուեցաւ ՀԲԸՄ—ի հոգատարութեան կիզակէտին վրայ: ՀԲԸՄ-ի Լիբանանի ընտանիքը առաջնորդութեամբ իր նուիրեալ ղեկավարութեան, յենարան ունենալով ՀԲԸՄ-ի աշխարհասփիւռ ընտանիքը, անմիջապէս ձեռնարկեց մարդասիրական լայնածաւալ աշխատանքներու՝ անխտիր հասնելով բոլորին առողջապահական, շինարարական, պարենաւորման եւ այլ պէտքերուն:
27 Սեպտեմբեր 2020-ին վրայ հասաւ Արցախեան պատերազմի արհաւիրքն ու անոր հետեւանքները: ՀԲԸՄ կրծքաբաց ընդունեց մարտահրաւէրը ինչպէս միշտ ըրած է Հայ Ժողովուրդին վերջին աւելի քան հարիւր տարուայ պատմութեան մէջ՝ ճակատագրական պահերուն կատարելով իր ազգային պարտականութիւնը:
Հայրենիքի դիմագրաւած յետպատերազմեան ներքաղաքական ճգնաժամին, ՀԲԸՄ լուռ հանդիսատեսի դերի մէջ չմնալով ունեցաւ յանդուգն եւ պատուաբեր կեցուածք:
Աւելին՝ իր նախագահին կոչով այսօր ՀԲԸՄ իր տեսլականը ունի Հայրենիքի ապագայ առողջ կառավարման գերխնդրին նկատմամբ:
Մենք երախտապարտ ենք ՀԲԸՄ-ի կատարած անզուգական աշխատանքին:
Մենք հպարտ ենք.
Ազգային առումով գաղափարակիցն ու զինակիցները ըլլալու ՀԲԸ Մեծ Միութեան: Միասնաբար դրօշակակիրները ըլլալու Մայր Աթոռ Ս. Էջմիածնին:
Ուս-ուսի անվերապահ եւ անձնազոհ զինուորները ըլլալու Մայր Հայրենիքին:
Ռամկավար Ազատական Կուսակցութեան աշխարհասփիւռ տարբեր շրջանակներու երկու ներկայացուցիչներս, դարձեալ կը շնորհաւորենք մեր հոգեհարազատ Միութեան 91-րդ Ընդհանուր Ժողովը ու բարձր կը գնահատենք անկէ բխած բանաձեւումները, նորանոր յաջողութիւններ մաղթելով ՀԲԸՄ-ի մեծ ընտանիքին: Լաւագոյնս կը մաղթենք ՀԲԸՄ Կեդրոնական Վարչական Ժողովի վերընտրուած անդամներուն, իրենց անձնական, թէ միութենական աշխատանքներուն համար:
Բարեկամական ջերմ ողջոյններով,
Ի դիմաց՝
ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ
ԼԻԲԱՆԱՆԻ ՇՐՋ. ՎԱՐՉՈՒԹԵԱՆ ՀԱՐԱՒ. ԱՄԵՐԻԿԱՅԻ ՇՐՋ. ՎԱՐՉՈՒԹԵԱՆ
ՍԵՒԱԿ ՅԱԿՈԲԵԱՆ ատենապետ ՍԵՐԽԻՕ ՆԱՀԱՊԵՏԵԱՆ ատենապետ
ԱՐՄԷՆ ՎԱՅԷՃԵԱՆ ատենադպիր ԳԱԲՐԻԷԼ ՆԱԼՊԱՆՏԵԱՆ ատենադպիր